ऑनलाइन सिरहा डटकम /दक्षिणी र मध्य इराकमा शृङ्खलाबद्ध रुपमा भएका कारबम आक्रमणहरुमा कम्तीमा ५१ व्यक्तिको मृत्यु भएको समाचार छ । इराकको पूर्वी प्रान्त दियाला र दक्षिणी प्रान्त बास्राको बजारइलाकामा सोमबार भएका आक्रमणहरु कम्तीमा ५१ व्यक्तिको मृत्यु हुनुको साथै अन्य ९२ जना घाइते भएका छन् । सोमबार र मङ्गलबार इराकका यी विभिन्न क्षेत्रमा भएका कारबम हमलाहरुमा ती व्यक्ति मारिएका प्रान्तीय प्रशासन स्रोतले जानकारी दिएको छ । ती विस्फोटनहरु प्रान्तीय राजधानी बाकुबाबाट उत्तरमा पर्ने खलिस सहर र तेलको लागि प्रख्यात सहर बास्राको दक्षिणतर्फ पर्ने जुबार सहरको प्रख्यात बजारहरुको पार्किङ्ग इलाकहरुमा भएको जनाइएको छ । विस्फोटनहरुमा सर्वसाधारणका कार र अन्य कैयौँ कारलगायत पसलहरु र वरपरका इलाकामा ठूलो क्षति पुगेको पनि समाचरमा जनाइएको छ ।आइएसद्वारा ७० को हत्या
यसैबीच अन्बार प्रान्तमा आइएस आतङ्ककारी समूहले करिब ७० जना व्यक्तिको हत्या गरेको प्रहरी र आदिवासी नेताहरुले जनाएका छन् ।अन्बार प्रान्तका विभिन्न भू–भागमा भएका आइएसका यी हमलाहरुमा परी ती व्यक्तिको ज्यान गएको बताइएको छ । आइएसका लडाकूलाई लक्ष्यगरी इराकका विभिन्न क्षेत्रमा यसअघि अमेरिकी नेतृत्वको हवाई कारबाही गर्ने गरिएको थियो । तर हाल आएर भने सो हमला रोकिएको छ । सो कारबाहीका क्रममा पनि सयौँ जना आइएस लडाकू मारिएका थिए । संयुक्त राष्ट्रसंघद्वारा प्रकाशित एक प्रतिवेदनअनुसार इराकमा जारी आतङ्क र हिंसामा परी सन् २०१४ मा कम्तीमा १२ हजार २८२ व्यक्तिको मृत्यु हुनुको साथै अन्य २३ हजार १२६ जना घाइते भएका थिए
