मिर्चैया : टी–२० क्रिकेटको उपाधि सिरहा एकेडेमीको कब्जामा (फोटोसहित)

राम नारायण पंडित, सिरहा, १५ मंसिर । सिरहाको मिर्चैयामा सम्पन्न टी–२० क्रिकेट प्रतियोगिताको उपाधि सिरहा एकेडेमीले कब्जा गरेका छन् । बिजयादशमी, शुभदिपाबली तथा छठ पर्बको अबसरमा आयोजित अन्तर–जिल्ला स्तरीय टी–२० प्रिमियर लिग (एमपिएल) क्रिकेट प्रतियोगिता अन्तर्गत आज (शनिवार) सम्पन्न फाइनल खेलमा सिरहा एकेडेमीले महेन्द्रनगर क्रिकेट टिमलाई ४ बिकेटले पराजित गर्दै बिजयी भएका छन् ।

टस जितेर पहिला ब्याटिंग गरेको महेन्द्रनगर टिमले १८ ओभरमा अलआउट हुँदै ६४ रन बनाएको थियो । जबाफमा ६५ रनको बिजयी लक्ष्य लिएर मैदानमा उत्रेका सिरहा एकेडेमीले १८.५ बल खेल्दै ६ बिकेटको क्षतिमा लक्ष्य हासिल गर्दै बिजयी भएका छन् ।

मिर्चैया नगरपालिका बडा नं. ५ स्थित मोहन माबिको मैदानमा भएको खेलमा बिजेता टिम सिरहा एकेडेमीलाई मिर्चैया नगरपालिकाका मेयर श्रबण कुमार यादबले २५ हजार रुपैया नगद र ट्रफी प्रदान गरेका थिए । त्यसैगरी उपबिजेता टिम महेन्द्रनगरलाई माँ अम्बे ट्रेडर्स एण्ड ग्लोबल ट्रेडिङ मिर्चैयाका संचालक लालबाबु साहले १५ हजार नगद र ट्रफी प्रदान गरेका थिए ।

पुरस्कार बितरण गर्दै मेयर यादबले नगरमा खेलको बिकासकालागि मिर्चैयामा प्रदेश स्तरका खेलकुद आयोजना गर्ने उद्घोष गरेका छन् । कार्यक्रममा बडा नं. ४ का बडा अध्यक्ष दिनेश कुमार यादब, बडा नं. ५ का बडा अध्यक्ष धिरेन्द्र कुमार साह लगायत स्थानियबासी, ब्यापारी, खेलप्रमी लगायतका उल्लेखनिय उपस्थित रहेको थियो ।